مظفرآباد :سیکرٹریٹ ایکشن کمیٹی آزادکشمیر کے سابق چیئرمین احسن رشید ڈار نے عوامی ایکشن کمیٹی سے مطالبہ کیا ہے کہ کرپٹ ریاستی بیوروکریسی کی عیاشیوں اورغنڈہ گردی کا نوٹس لیا جائے، ریاستی وسائل کی لوٹ مارکے پیچھے سیاسی قیادت کے بجائے ریاستی بیوروکریسی کاہاتھ ہے جبکہ بیوروکریسی نے ایک منظم سازش اور منصوبہ بندی کے تحت عوامی غیض و غضب کارخ سیاسی قیادت کی جانب موڑ رکھا ہے۔ اپنے ایک بیان میں سابق یونین لیڈر اور کالم نگار احسن رشید ڈار نے کہا ہے کہ اگر بیورروکریسی کی عیاشیوں اورضمیرفروشی کو منظم عام پر لایاجائے تو سیاسی قیادت ان کے سامنے معصوم نظر آئے گی۔ ریاست کے تمام مسائل کی جڑ بیوروکریسی ہے۔ جو سر سے لیکر پاؤں تک کرپشن میں لتھڑی ہوئی ہے۔ ایک سیکرٹری اور سربراہ محکمہ کروڑروں روپے مالیت کی متعدد گاڑیاں استعمال کرتاہے جبکہ گھر میں دفتر کے چپڑاسیوں کی فوج ڈیوٹی پر لگا رکھی ہے۔ بے ضمیر بیوروکریسی روزانہ سینکڑوں عوام کو خاموشی سے قتل کرتی ہے۔ میرٹ کا سرعام قتل کیا جاتا ہے۔ دفتر کی سٹیشنری تک چھپا کر گھر لے جاتے ہیں اور ہر کام کیلئے کمیشن ہے۔یہاں تک سکیل 17 کے آفیسرز تک نے اسلام آباد کی پوش رہائشی سکیموں بحریہ ٹاؤن، بحریہ انکلیو،ڈیفینس میں اربوں روپے کی پراپرٹی بنا رکھی ہے۔ صرف کشمیر ہاؤس کا ایک سکیل 17 کا ملازم بحریہ انکلیو اسلام آباد میں پلازیوں کا مالک ہے جن کی مالیت کروڑوں میں ہے۔ سکیل 17 کی تنخواہ میں ایک ملازم کروڑوں روپے کی پراپرٹی کیسے بناسکتاہے حکومت کو اس کے بارے میں سوچنا ہوگا۔ انہوں نے عوامی ایکشن کمیٹی سے مطالبہ کیا کہ آزادکشمیر کے عوام کی اصل دشمن،کرپٹ اور ضمیر فروش بیوروکریسی کو لگام دینے کیلئے کردار ادا کیا جائے اور سیاسی قیادت کو بخشا جائے کیونکہ اصل مجرم بیوررکریسی ہے جس دانستہ سیاسی قیادت کوبدنام کر رہی ہے۔
